.gif)
GoBetawi.com - Jalan tanah yang becek akibat ujan deres kemaren mangkin keliatan parah ame bekas ban kendaraan semalem. Pot taneman di pekarangan rumeh warge juge banyak nyeng teguling bahkan pecah kerna ketanggor. Sampah plastik bekas botol minuman, kantong keresek ampe bungkusan makan amprak-amprakan mulain dari jalanan ampe ke tegalan tempat dimane panggung keriaan semalem bediri. Puun pisang yang udah bebuah kaga sedikit yang rebah kerna ulah penonton.
Hajatan semalem emang termasuk gede-gedean, bahkan bise jadi keriaan paling akbar sepanjang sejarah di kampung Bengkok. Bukan cuman tetamu yang ngebludak, penonton hiburan yang disediain ame pemangku hajat juga bejibun banyaknye... Pedahal acaranye cuman sunatan si Jaka, anak kesayangannye enyak Rogaye. Lucunye lagi si Ucup, anak pungutnye nyeng udah baleg pake ngikut diriasin juga, pedahal Ucup udah lima taon lebih disunatinnye Bahna tempo itu ucup belon jadi anak pungutnye enyak Rogaye, jadi kaga dipesta-in dah sunatannye.
Acare yang diada-in dari selepas ujan kemaren siang, dimulain ame ngarak penganten keliling kampung. Tanjidor baris paling depan ngiringin tige orang nyeng ngibing make topeng di mukanye...sementare dibelakang tanjidor mubil odong-odong jalan pelan ngangkut sepasang penganten sunat. Tukang jajanan nyeng sengaje disewa enyak rogaye bejejer di sepanjang pekarangan...semua tetamu maopun penonton bebas makan sesuke ati...
Kong Lihin nyeng masih familinye enyak rogaye pernah ngingetin waktu si enyak ngelontarin ide ngadain keriaan gede-gedean macem begini, "Emang lu kaga malu ame warge mao ngada-in pesete semalem suntuk cuman buat ngeraya-in sunatan si Jaka?". Tapi enyak Rogaye malah sinis nanggepin ntu tegoran "Cing...aye ude puas kenyang melarat...kalu sekarang aye bikin peste nyeng anak aye, entu buat nunjukin ke warge kao aye udah bukan orang suseh lagi...Rogaye nyeng sekarang bukan jande melarat kaye nyeng dulu...". Kong Lihin balik nanye lagi: "Tapi pan lu tau warge di sekiteran kampung eni rata-rata orang kaga mampu, emang kagak bise elu bikin acara keriaan nyeng sederhane aje...?" Tapi lagi-lagi enyak Rogaye bekelit "..Cing kalu aye ngadain acara nyeng sederhane, orang kagak bakalan tau siape rogaye nyeng sekarang enih...Orang kaga bakal ngeliat bahwa rogaye nyeng sekarang punye kuase....Kalu ada nyeng tanye kenape banyak makanan gratis, bilang aje entu mah sumbangan dari tetangge nyeng girang kerna si Jaka disunat...Beres kan...? Pekare biaye mah kecil Cing, duit siape kek, kite pake aje dulu...Biarin dah kite tekor, asal bise kesohor...!!".
Maka begitulah akhirnye..., hajatan akbar pun digelar. Macem-macem hiburan disedia-in...penonton dateng dari segale penjuru, tumplek blek disatu lokasi...Keriaan di rumeh enyak Rogaye baru kelar pas suare adzan subuh kedengeran sayup-sayup dari Langgar pinggiran kampung.
Nyeng keliatan pagi ini cuman tumpukan piring ame gelas kotor, tumpukan sampah, dan kondisi rumeh nyeng udah mirip kapal pecah...Seperti lagu nyeng dinyanyi-in ame penyanye dangdut di penutup acare "PESTA PASTI BERAKHIR".
Sumber Status Facebook Bang Untung P Napis
Klik Download Untuk Aplikasi Android GoBETAWI.com
0 Response to "HAJATAN BETAWI "Biar Tekor Asal Nyohor...""
Posting Komentar